Токио "Катта Дубулға" турнирини медалсиз якунладик

Айни дақиқаларда мусобақанинг икккинчи кунги саралаш баҳслари ўз якуни сари яқинлашяпти. Бугун терма жамоамизнинг 3 нафар вакили медаллар ҳамда қимматли рейтинг очколари учун татамига чиқди. Афсуски, бугун ҳам кечаги кун сингари медаль бўлмади. 

-60 кг вазн тоифасида курашган Дилшодбек Баратов ўз иштирокини тўғридан-тўғри иккинчи босқичдан бошлади ҳамда мўғулистонлик Тсогт-Очир Бямбаявга ютқазиб қўйди. 

-66 кг вазндаги тажрибали дзюдочимиз Сардор Нуриллаев биринчи даврада филиппинлик Шуген Наканодан устун келди. Аммо кейинги босқичда мўғулистонлик Эрхембаяр Баттогтоҳга имкониятни бой берди. 

+100 кг вазн тоифасидаги совриндор дзюдочимиз Алишер Юсупов ҳам тўғридан-тўғри иккинчи босқичдан баҳсларга қўшилди. Кореялик Жаэгу Юнни мағлубиятга учратган Юсупов чорак финалга йўлланма берадиган беллашувда икки карра Олимпиада ва жаҳон чемпиони, чехиялик номдор Лукаш Крпалекдан енгилди. 

Шу тариқа, Ўзбекистон терма жамоаси дзюдо ватанида ўтказилаётган ва дунёнинг номдор спортчилари жам бўлган йилнинг сўнгги "Катта Дубулға" турниридаги иштирокини медалсиз якунлади. Айни шу дақиқаларда терма жамоамиз биттадан бешинчи ва еттинчи ўринлар билан 15-поғонадан жой олиб турибди. 

Япониядаги ҳар қандай мусобақада медаль олиш жуда мушкуш. Медаллар японларнинг ўзидан деярли ортмайди. Бир пайтлар Ришод Собиров Кунчиқар юртда жаҳон чемпиони бўлган эди. Икки йил аввал Токиода Давлат Бобонов Олимпиаданинг бронза медалини қўлга киритган.