Ханчжоу-2022, Париж-2024: Бокс бўйича терма жамоамизнинг тайёргарлик режалари кўриб чиқилди

Бу борада МОҚ спорт федерациялари ва ассоциациялари билан ҳамкорликдаги ишларни бошлаб юборган. МОҚ раиси Ўзбекистон бокс федерациясига ташриф буюриб, жамоамизнинг бўлажак мусобақаларга тайёргарлик режалари билан яқиндан танишди. Мазкур йиғилишда МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов бошчилигидаги федерация мутасаддилари, мураббийлар ҳам иштирок этишди.

Йиғилишда федерация мураббийлар штаби ёшлар жамоаси билан ишлаш, ўсиб келаётган “Ўзбек йўлбарслари”нинг салоҳияти, бўлажак мусобақаларда иштирок этишга номзод боксчилар, терма жамоаларни ушбу Ўйинларга тайёрлашда ташкил қилинадиган муҳим босқичлар ҳақида батафсил гапириб ўтишди. Ўз навбатида, Рустам Шоабдураҳмонов боксчиларимизга бўлажак мусобақаларда катта умид боғланганига тўхталиб ўтди.

“Ҳозир боксчиларимиз жаҳонда етакчи эканликларини исботлаб бўлишди. Ушбу спорт турида ўзбек моделини дунё тан олди. Янгиободда терма жамоамиз билан ўқув-машғулот йиғини ўтказишни истаётган хориж жамоалари қанча эканини барчангиз яхши биласиз. Халқимиз ва Муҳтарам Президентимиз барча спорт турлари қатори боксчиларимиздан ҳам бўлажак мусобақаларда чиройли ғалабалар кутишмоқда. Ҳукуматимиз барча режаларимизни қўллаб-қувватламоқда. Биз Жисмоний тарбия ва спорт вазирлиги, федерацияларимиз билан бир жамоа бўлиб, бир мақсад сари ҳаракат қиламиз”, – деди МОҚ раиси.

Йиғилиш давомида иқтидорли боксчиларни саралаб олиш учун селекцион мусобақаларни кўпайтириш ва мазкур йўналишга алоҳида аҳамият қаратиш, шунингдек, аёллар терма жамоасини ҳам жаҳон етакчилари қаторига олиб чиқиш каби йўналишларда тегишли топшириқлар берилди.